Auguri per i 95 anni in Calabria
Una furtiva lacrima mi cala però imperiosa
admin
Oggi mia madre compie 95 anni, è una gioia per me godere ancora della sua presenza e del suo amore. Una furtiva lacrima mi cala però imperiosa, nel vedere la sua silenziosa sofferenza senile:
MAMMA
Curcata nta nu pizzu di divanu,
curva di hjancu, tutta di nu latu,
ca facci ricogghjuta nta na manu,
ti viju oji mamma, adduluratu.
L’occhji pigghjati di la sonnolenza,
non hannu cchjuni lampu pe’ lucìri,
li gambi fiacchi, chin’e sofferenza,
sunnu cogghjuti quasi a scumpariri.
Na ruga mi cumpari nta la frunti,
chi pena u cori meu vidend’a ttìa!
Carogna la vecchjaja è senza scunti,
non dassa scampu e lestu ti currìa.
Ti viju mamma quandu figghjoleḍḍu,
mi stav’arretu senza mai rigettu,
non era certu propriu n’angiuleḍḍu,
ma mi mparasti prestu lu rispettu.
Fusti majscia di la vugghj’e filu,
pe lu cuggiri non avivi pari,
pe ttìa non ti cercasti mai nu spilu,
avivi na famigghja a ccu pensari.
Lu tempu passa e non nc’è riparu,
su tant’i sciali e puru li duluri,
fust’a regina di lu focularu,
dunast’a li to figghji assai caluri.
Mamma, ti pregu, non mi bbandunari,
‘nvecchjatu su pur’eu, cu ddui niputi,
stringi li brazza mei, non mi dassari,
non esti ancora l’ura di saluti.
Rocco Criseo
